தென் இந்தியப் பகுதிகளில் மக்களால் பேசப்படும் மொழிகள் ஒன்றுடன் ஒன்று தொடர்பு கொண்டு விளங்குகின்றன. அங்ஙனம் தொடர்புடைய 30 மொழிகள் திராவிட மொழிகள் என்று குறிக்கப்படுகின்றன. கி.பி. 1856 இல் "திராவிட மொழிகளின் ஒப்பிலக்கணம்" என்ற நூலைக் கால்டுவெல் வெளியிட்டார். ‘திராவிட மொழிகளின் ஒப்பியல் ஆய்வின் தந்தை’ என்று கால்டுவெல் அழைக்கப்படுகிறார். ‘தமிழ்’ என்பது ஒரு குறிப்பிட்ட மொழியைக் குறிக்கும் சொல். பல்வேறு மொழிகளைக் கொண்ட குடும்பத்தைக் குறிக்கப் பிறிதொரு பெயரை அமைத்தல் சிறப்புடையது என்று பரிசீலித்து, ‘திராவிடம்’ என்ற சொல்லைத் தாம் தேர்ந்தெடுத்ததாகக் கால்டுவெல் கூறுகிறார்.